أنا فى أجازة نصف السنة دلوقتى فقررت بدل تضيع الاسبوعين تماما انى اجرب حاجة جديدة
وبكل صراحة بعد دخول الكلية حسيت أنى جالى توحد مبقتش اتعامل غير مع الناس اللى اعرفهم كويس والمرض الفظيع اللى كان عندى انى اتعرف على ناس كتير عشان استفيد منهم خبرات واكسب صداقات جديدة كان بجد اوشك على الانتهاء..
فقررت أروح دورة تنمية بشرية بدون أى تخطيط فجأة كدة
يمكن بجد أتغير زى ماسمعت أن المدربين فى الدورات دى بيغيروا مسار ناس بجد لانهم كمان ف الدورات دى بيفهموا الناس أسس النجاح
والزاى يبقا عندك هدف محدد ممكن يوصلك تبقا من أنجح الشخصيات اللى بتأثر فى تاريخ ونهضة دول..
روحت وكنت مش مقتنعة أوى بالعبط دا كله بس بجد اكتشفت بلاوى بمعنى بلاوى
أول ما المدرب شرح بعض حاجات أنا بجد بدأ يجيلى ذهول...هوا أنا ليا هدف؟هدف محدد؟
يعنى هدف عشانه أتنازل عن حاجات كتيرة عشان أحققه يعنى عندى أصرار ومبفكرش فعلا غير ف الوصول ليه؟؟وبعمل كل حاجة تخلينى بجد أبدأ فى تحقيقه؟؟؟؟؟
لما لقيتنى بسأل نفسى فى أول كام دقيقة قررت أركز أوى مع المدرب ولقيت أنى بعمل حاجات كتير تلقائيا وبدون سابق معرفة ان دى اسس من اسس النجاح..
حضرت ال3 أيام المكثفين
أنهاردة خلصتهم وهاعيد كتابتهم هنا لسبب واحد
أنى كنت عاوزة مجرد انى انجح عموما
بس عمرى ما حددت حاجةعشان لو الظروف غيرتها نفسيتى ماتتعبش
وبمعنى أصح كنت حاطة للفشل مش النجاح مقاييس غريبة وبسببها نجحت بس تعبت جسديا وذهنياونفسيا جدا
وكانت عندى مشكلة لقيت حلها ف التلات ايام دول انى كل ما كنت ابدأ حاجة
وأصمم أنى أنجح فيها كنت بطلع ف الروح من الزهق وهيا على وشك انها فعلا تتحقق
ومكنتش بوصل للى انا عايزاه
نجاحى فى مجال الغزل والنسيج هوا هدف من أهدافى والبداية قلم وورقة..
هاكتب أهدافى وهاخليها قدامى مش مهم هافشل قد أيه
المهم بجد أكتر أن كل أنسان يحس أنه بيبذل أقصى مجهود وخلص بنزينه لاخر نقطة
عشان ميرجعش يندم على وقت ضيعه من غير أى أنجاز حقيقى
وأى حد عايز يحس بالسعادة والنجاح والرضا بجد ولو للحظة واحدة فى عمره
يبدأ بالعبادة أولا وبعدين مساعدة الناس
المرة الجاية هاكتب
العادات السبعة لاكثر الاشخاص فعالية
ودا كتاب لستيفن كوفى ودا من أنجح مدربى التنمية البشرية على مستوى العالم ولن أنسى ذكره لرسولنا الكريم
محمد صلى الله عليه وسلم فى كتاباته بأنه من أكثر الناس فعالية ف العالم
برغم أميته ونشأته البدوية
ليست هناك تعليقات:
إرسال تعليق