أكيد دى أغلس حاجة فى الدنيا انك تحسي انك مضطهدة بسبب لونك او كونك بنت او كونك غير مؤهلة بدنيا للمهنة اللى انتى مقبلة عليها...ذنبى ايه انى اخترت قسم حبيته وحبيت كل حاجة فيه حتى دكاترته اللى كانوا اظن احسن حاجة فيه....ذنبى ان كل اللى بيشغلوا مهندسين النسيج بيسحلوهم وانى مقدرتش اكمل اسبوع فأول شغل إذا كان الصبيان اللى معايا مكملوش اكمل انا ليييه؟!
العيب فمين؟ ولا فى ايه؟ بعد خمس سنين كفاح ورايح جاى ودرس استاتيكا ومراجعة فيزيا ولاميكانيكا ..قعدت فى البيت وخدت اللقب مهندسة...اى نعم بس مع إيقاف التنفيذ خايفة اقدم فأى شغل تانى لا يطلع بصحيح العيب فيا ويطلعونى صحتى على قدى ونفسى قصير والمشكلة ان كل ده بيتقالى حتى وانا فالكلية...متضايقة اوى انى كنت متحمسة اثناء الدراسة واتخرجت ملقتش غير الواقع الغبى ده...متعودتش استسلم...كل مرة كنت بيحصلى مشكلة فحياتى كان بيبقا نفسى طويل فيها وادور على اسبابها لحد ما احلها......المرة دى عاوزة اخرج من القرف واللى دخلنى فيها النسيج ده بجد...ليه اتحول لمجرد ترس فماكينة كبيرة جوة مصنع مجرد مهندسة لقب زايف ملوش لازمة وخمسميت واحد يعرفوا يعملوا شغلى...يعنى ايه اتحرم من اللى باقى فى انوثتى وانسى انى بنت واهتم بنفسى شوية مش كفاية انى كنت هانسى بسبب الكلية يبقا حرام ده ولا حلال...عادى برغى مع نفسى كالعادة بدل ما تجنن محدش حواليا فاهمنى كأنى بقول لوغاريتمات
ماما مش عايزانى اعيد قصة كفاحها الهندسية الفظيعة .....وابويا اللى عمال يربينى ويعاقبنى صدق بجد انى بقيت ابنه اللى مخلفوش ينهار اسود والله بقا بيناديلى بأسم ولد اعمل ايه يا رب هيا ناقصة عقد اكتر من كدة.....قربت انسى انى بنت!!!!!!!!!
وكمان اشتغل فالنسيج ياخى هععععععع بكل فخر هابعد عن النسيج وهاغنيله.. أشتغل اى حاجة....لحد ما ربنا يكرمنى براجل محترم واتفرغ للبيت ول انى اتبرمجت على الادارة وجو الشغل المهبب ده ووقت التسليمات وضغط وتوتر الشغل فعلا اتعودت
انا كدة تقريبا مبرتحش غير لما اتعب...هاختم باللى قاله صلاح جاهين
على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
عشان برغم كل اللى القرف والكويز والعجن اللى جواكى يا مصر لسه فيكى نبض
ليست هناك تعليقات:
إرسال تعليق