بحب أحيانا فمدونتى أنها مهجورة من اى حد بيرد نوعا ما..حلو ان الواحد كل فترة ياخد وقت ويراجع حساباته
انا فوقت صعب وغريب فجأة كأن الدنيا رجعت بيا 6 سنين ورا فكل حاجة الا حاجة واحدة...انا ..كنت اكيد احسن حال قبل الست سنين دول عدى عليا اوقات كتير فيهم مكنتش بنام غير وعنيا وارمة من العياط والتعب..ووقت تانى كنت حاسة بالضغط والظلم ومعلقة دايمة على شماعة الظروف أحوالى اللى مش عجبانى كل حاجة اتمناها ومتحصلش اقول الظروف؟...بس اظريف انى اتعلمت حاجات كتير فأخر 3 شهور دول بس اغلب الدروس اللى كان لازم اتعلمها كأساس عشان أبدا حياتى بنظرة مختلفة تماما غير نظرة الطفولة الغبية الى كنت ببص بيها على العالم من حواليا..عندى 23 سنة وجواليا بالظبط كنت متعداش 10 سنين فعندى وطفولتى وتصرفاتى واللامبالاة اللى كان تجاه كل حاجة مفهماش فطريقى..غريب أن الالم اللى بنمر بيه بعد اى صدمة فحياتنا بيكمل جزء فشخصيتنا واحيانا بيعرفنا قيمة نعمة مكناش مقدرين مجرد وجودها فحياتنا...دايما كان جوايا حزن ومرارة غير مبررة بعكس ملامحى اللى دايما على اشدها من الضحك ومن جوة ضلمة وزحمة وحزينة ووحيدة...وكل ما كانت تمر بيا السنين كل ما الزحمة والتقوقع ده بيزيد والبعد والهروب والنوم يزيد والاقى الدايرة بتبلعنى جواها تانى ومخرجش منها الا بفرحة مصطنعة كالعادة ارسم البسمة عشان اكيد اللى بيحبونى ملهمش ذنب بحالتى دى...
ايوة عرفت كويس اوى ان نظرتنا تجاه كل حاجه فالدنيا هيا اللى بتلونها باللى جوانا....كل حاجة لحد وقت قريب كانت رمادى طول الوقت على طول الخط بدون استثناء بقول انى متفائلة بكل جوارحى الا قلبى كان يقولى يا كدابة بتضحكى على نفسك ويطلعلى لسانه..وارجع انام واكتئب تانى وهلما جرى...
تعبت من ده كله وقررت الونك يا دنيا
اخضر عشان الزرع اكتر حاجة بنسا فيها زحمتى وحزنى وازرق بلون البحر اللى بيطل عليه بيتى اللى فخيالى
كلها الوان صافية كفاية عكارة بقا
وحبيب منتظرنى عشان نلعب ونجرى ونضحك ودفا يعوضنى عن كل المرارة اللى شيلتها معايا كل الوقت ده
قررت أخف وانسى الحمل اللى مشيلاه لنفسى من غير لزمة
قررت يبقا عندى أمل فربنا أكتر من أملى فأى حاجة تانية عارفة انه الوحيد اللى سامعنى وعالم بضعفى عارفة انه موجود برحمته اكتر من غضبه وبنعمه علينا اللى احنا ناسينها بس لو دققنا كويس فصورة حياتنا من برة كدة اكيد هنشوفها
عمرى ما هيأس من الامل فرحمة ربنا بينا ابدا مهما غلطنا ومهما ضعفنا ربنا الوحيد اللى عالم بينا وباللى نقدر نتحمله اكيد
عشان كدة قررت انى هعيش مبسوطة لأنى راضية
راضية بكل نعم ربنا عليا اوى واللى اكيد تستاهل انى اصونها واحمده عليها لحمد ماموت بس لحد الوقت ده مش هافكر ابيض واسود بس
هادلق بقية البالتة بتاعة الوانى على حياتى واكيد هتبقا احلى مليون مرة عن دلوقتى كمان
ليست هناك تعليقات:
إرسال تعليق